كيف تضع خطة تسويقية ودراسة شاملة للمشروع ديالك 👌💯
لنبدأ ⏳
✳️ أول شيء هي دراسة المشروع في هذه المرحلة عندك دراسة داخلية لي كتخص المشروع ديالك بمعنى هنا كتحط الأساس للمشروع وكتدرس كل حاجة على حدى ولي ضمنها تيكون الفريق ديالك والمهام ديالو تقدر تبدا بحديتك كبداية لكن من بهد أتكبر وخاص تكون عندك نظرة شاملة وواضحة من الأول هنا في هاذ النقطة كنحطو الحجر الأساس لمشروع ديالنا :
✅الموردين : لي غادي تعامل معاهم على حسب بيزنس بلان ديالك واش اتدير صناعة - إستيراد - بائعي الجملة - وسطاء - مصانع - تعاونيات .... هنا كتختالف على حسب نوع مشروعك والشركاء لي محتاج .....
✅اللوجيستيك : هنا كنهضرو على الإستيراد التوزيع التوصيل نقاط البيع، التخزين كل مايتعلق باللوجيستيك مثلا في التجارة الإلكترونية خاصك تعرف شكون شركاء ديالك في التوصيل متنساس شركة التوصيل عندها مسؤولية كبيرة في تحديد نجاح او فشلك او حتى الصورة ديالك لأنها هي لي كتوصل منتجك الزبون وحتى المدة الزمنية ..... هنا كل شخص والدافع لي كيخليه اختار شركة معينة كاين لي كيقلب على أقل ثمن كاين لي كيقلب على أفضل جودة ...... وهكذا حتى بالنسبة التخزين والاستيراد ...
✅المستهلك أو الزبون : خاص تكون عندك دراية شاملة وواضحة على نوع الزبون المثالي ديالك وشكون هو وفين كاين وكفاش كيشري غادين نشوفو تفاصيل أكثر في المقال .....
✅فريق التسويق : هاذي نقطة مهمة تقدر تدير هاذشي بحدك كبداية وغادي تحتاج ناس لي اخدمو معاك فريلانس لكن مزيان تكون حاط هاذشي في بيزنس بلان ..... ( غادين نهضرو على فريق التسويق في اخر نقطة )
✅فريق البيع وخدمة العملاء : هنا خاص اكون عندك نموذج واضح على طريقة وكيفية تواصلك مع زبناء وإقناعهم، بزااف مكيعطيش أهمية لهاذ النقطة كاين بزااف ديال المصطلحات لي كتوصف لينا هاذ رحلة العميل ..... كتبدا من أول إتصال معاه لمرحلة انك كتبيع ليه باش تبيع ليه فلسفة خاصك تكون ظابطها وكذلك المتابعة ...... حتى لآخر نقطة لي هي الوفاء وادير ليك إحالات ويسوق ليك بالمجاااان .....
✅التسيير - المحاسبة - المسائل القانونية - التوظيف ...: هاذشي كامل خاصك تكون درجتيه في نموذج العمل الخاص بيييك وعارف كل بلاصة أشنو غادي تحط فيها ...... هاذشي فقط رؤوس أقلام ...
✳️الدراسة الخارجية : وحتى هي كتمقاسم لجزئين نذكرهم بإيجاز
الجزء الاول كنتبعو فيه إستراتيجيات لي كتخلينا نديرو دراسة شاملة ولب نقدرو نبسطوها في 4 نقاط : نقاط القوة ديالك والميزة التنافسية لي غادي تكون عندك وكذلك نقاط الضعف ديالك فاش عندك مشاكل باش حسن منك المنافسين وتحدد كفاش اتخدم عليهم، ثالث نقطة لي هي الفرص المتاحة ديالك هاذ الفرص ماشي حنا لي كنتحكمو فيه بل فرص كتكون في السوق يجب عليك وضع خطة باش تربحها وكذلك عندك التهديدات ديما خاصك ترد لبال وتكون à jour ماشي لكنت خدام كنبيع وكنشري كنعس ديما رد البال أنه في أي لحظة إخرج ليا منافس من حيث لا أدري او تواجه مشكلة معينة .....
الجزء الثاني عندو علاقة بالسوق : الوضع الاقتصادي، الإجتماعي، السياسي، القانوني، التكنولوجي، الايكولوجي ... هاذشي فاش كتدريو كتقدر تعرف اشنو تقدر تبيع اشنو لي لا الاقتصاد عندك كفاش داير اشنو المنتجات لي تقدر تدخل السوق كفاش اتحط الثمن اشنو لي ممنوع اشنو لي الثقافة ديال الفئة المستهدفة ديالك غادي اعجبها واشنو لي العكس .........
حنا تال دابا عطينا فكرة شاملة وسطحية على المنهج لي خاصك تبع باش تحط الأساس المشروع ديالك ( هاذشي ماشي كلشي لكن بعض الأساسيات )
الجانب التسويقي :
1️⃣ أول حاجة كنبداو بيها هي تقسيم السوق الفئات كأنه لديك 🎂 كبيرة وبغيتي تقسمها الأجزاء وغادي تحدد كل جزء شكون غادي إياخدو ..... غير حنا هنا كنحدو كل جزء وكل فئة اشنو غادي نبيعو ليها هاذ النقطة ديال segmentation كنقسم داكشي وكندير ليه واحد التحليل ..... باش كنجي
2️⃣ المرحلة الثانية ولي هي ciblage كنختار كل فئة على حدة وكندرسها مزيااااان كنفهمها ولي كيساعدني فيها واحد المصطلح سميتو buyer persona قلبو عليه غادي اساعدكم كيخليني نعرف شكون هو الزبوم المثالي لهاذ المنتج كفاش كشوف كفاش كيفكر كفاش كيحلل شكون صحابو اشنو المعتقدات ديالو، اشنو التحصص ديالو، فين كيدوز وقتو، اشنو المشاكل ديالو .... كتفلييييه بالمزيان، علاش ؟؟
الى قلنا ليك عندنا واحد المنتج وعندنا 2 زبائن قلنا ليك بيعيه ليهم الشخص الأول عطيناك جميع المعلومات عليه بحالي كتعرفو ... والشخص الثاني معندك عليه تا شي معلومة.... السؤال هو شكون غادي تقدر تبيع ليه بسهولة بلا مجهود ؟ راك عرفتي الإجابة .....
3️⃣ المرحلة الثالثة : كنسميوها التمركز في السوق وفي دهن الكليان باش بغيتيه اعرفك ؟ واش كتبيع الهوتة ؟ واش كتبيع الجودة ؟ واش كتبيع الثقة ؟ ........ هنا هاذشي مترابط مع بعضياتو ... تبع معايا حتى لخر باش تفهم ....
4️⃣ المرحلة الرابعة : المنتج او الخدمة ديالك هنا باش كتحط منتج في السوق وتحقق بيه نجاااح ماشي حتى كتحط المنتج وتقادو عاد كتبدا تفكر لمن غادي تبييعو ... لا عقلتي على المرحلة الثانية ديال ciblage وتحدد الفئة المستهدفة ديالك تمااا خاصك تكون عرفتي مزياان اشنو كيعجبها اشنو كتبغي .... فاش اتبغي تدير اومبالاج ماشي حينت عجبك ولا زوين لا ... خاصك تديرو باش اعجبك الفئة المستهدفة لي درستي .... التصميم ديالو المكونات الحلول لي غادي اجي بيهم خاص داكشي اكون مدروس من الأول .....
5️⃣ المرحلة الخامسة : ولي هي التسعيير باش تحط واحد الثمن كاين استراتيجيات بزااف واشهرهم كاين ثلاثة تبيع بثمن السوق، ولا أقل او أكثر ... باش تختار الاستراتيجية المناسبة ولي تعرف بلي غادي تنجح فراه خاصك تكون عارف مزيان الفئة المستهدفة والقدرة الشرائية واش قادر اشريه .....
6️⃣ المرحلة السادسة : نقاط التوزيع كفاش اتواصل مع هاذ الناس ديالك واش بنقاط البيع واش عبر مواقع التواصل الاجتماعي واش ... واش .... باش تعرف هاذشي ورجع سيبلاج قلب شوف شكون هذا وفين كاين وكفاش انهضر معاه ؟؟؟
7️⃣ المرحلة الأخيرة : ولي هي التواصل هنا فين كتبدا التسويق وبناء الاستراتيجيات التسويقية هنا فين كيجي البراندينغ هنا فين خاصك تكون عارف فين كاين زبون ديالك واش انستغرام واش فيسبوك واش تيكتوك ....... وتكون عارف اشنو متبع واشنو كيعجبو باش كتبدا بناء الهوية ديالك وحتى طريقة التواصل وصناعة المحتوى لي هنا خاصو اكون مبني على العديد من النقاط : اول حاجة غادي اعجب الفئة المستهدفة - ثاني حاجة التمركز ديالك باش بغيتي الناس اعرفوك ..... وبزاف ديال البلانات هاذشي لي كيكون لينا البراندينغ يا عزيزي ......
في هاذ المرحلة الى كنتي كتعتامد على التسويق الرقمي فراه خاص تكون حاط الخطط التسويقية ديالك ومقسم المهام وخاط الأهداف ديالك لأن هاذ المرحلة هي لي غادي تطبق فيها داكشي كامل لي خدمتي في المراحل السابقة ....
صناعة المحتوى اشنو نوع المحتوى واش تعليمي واش ترفيهي واش قصص واش مسابقات واش معلومات ...... شوف اكبر العلامات التجارية في فيسبوك وانستغرام اتفهم .... وفيما يخص العروض الترويجية وداكشي راه كبني على ما سبق مكيناش خطة تصلاح الكلشي .....
هنا عطيتكم نموذج هذا في حد ذاته درس كيسوى الفلوس ديال بصح وتحليل شامل ونتحداك تقلب في يوتوب واش اتلقاه مع العلم هاذشي مختاصر بزااف باش كلشي اقدر إقراااه هاذي خدمة التخطيط ديالها والعمل عليها كيحتاج شهوور .....
تدير مشروع ولا تجارة الكترونية بلا تخطيط مسبق بلا اهداف هو مجرد تخطيط للفشل .... هاذشي ماشي صعيب خاصك تشوفو فرصة لأنه بزااف مكيعرفوش وبسباب معرفوش كيفشل تعلم وابحث ودير استراتيجيات لي تبع باس تنجح كيف مكاااان.
نسا عليك بنادم وركز على راسك وحيد المقارنات وخدم باش تنجح ماشي باش تعجب شي واحد ولا اقولو فلان عندو ولا معندوش
تحياتي للجميع، أستودعكم في الله ✍️
Youness ramal
تابعنا على الانستجرام
https://www.instagram.com/ihtirafadsense